الحكاية بدأت لما مينا، شاب مسيحي محترم، عرف إن جارته المسلمة منى نفسها جدًا تعمل عمرة، وكانت بتشارك في مسابقة على فيسبوك فيها أسئلة دينية، والجايزة كانت رحلة عمرة.
مينا بالصدفة شاف المسابقة، وسأل منى: «إنتِ بتجاوبي على الأسئلة دي ليه؟» فقالت له إنها نفسها تكسب العمرة وتروح، وإن دي فرصة تتمنى ربنا يحققها لها.
مينا قال لها: «أنا كمان هجاوب معاكي، ولو الحظ مجاش لكِ، ممكن يجي لي أنا وأهديها لكِ».
وفعلًا دخل المسابقة وبدأ يجاوب على الأسئلة، وشارك مرات كتير جدًا، يمكن وصل لأكتر من 50 أو 60 تعليق، وكان هدفه من البداية إنه يساعد جارته ويفرحها.
ومنى بتحكي إنها من أول ما مينا شارك معاها كانت مبسوطة جدًا، وكانت بتدعي ربنا إنها تروح العمرة وهي لسه قادرة وتقف على رجليها وتعملها، وقالت إن ربنا استجاب لدعائها وجاب لها العمرة عن طريق مينا.
أما مينا، فبيقول إنه ماكانش متخيل إن العمرة ممكن تفرّح جارته للدرجة دي، لكن لما عرف إنها كسبت، لقاها متأثرة جدًا وفرحانة.
والأجمل إن ناس كتير استغربوا إزاي واحد اسمه مينا ومسيحي يشارك في مسابقة فيها أسئلة دينية، والأجمل من كده إنه كسب المسابقة، وقرر يهدي رحلة العمرة لجارته المسلمة.
مينا هنا ماكانش بيعمل حاجة علشان يثبت إن ده مسلم وده مسيحي، هو ببساطة كان بيحاول يفرّح إنسانة جارتُه، ودي يمكن أبسط وأجمل صورة للمحبة بين الناس.
ودي مصر يا جماعة.. ❤️🇪🇬
مسلمين ومسيحيين عايشين جنب بعض، جيران وأصحاب وإخوات، والمواقف الحلوة دي هي اللي بتفكرنا إن المحبة والجدعنة ملهاش دين.
ربنا يبارك لمينا، ويفرح قلب منى، ويحفظ كل أهل مصر، ويديم بينا المحبة والسلام.
مسيحي دخل مسابقة «عُمرة» عشان يهديها لجارته المسلمة.
